Category: Lajme nga Tregu

Ministrja e Financave, Anila Denaj ka njoftuar se Shqipëria po planifikon të lëshojë një Eurobond deri në 600 milion euro në muajin maj dhe jo në nëntor siç ishte planifikuar fillimisht.

Ky afrim kohor erdhi si pasojë e tërmetit të 26 nëntorit, dhe për këtë tashmë do të vendoset në muajin prill nëse do të huazonin më shumë për të mbuluar nevojat për rindërtim, ka bërë me dije Denaj.

“Në këtë mënyrë, ne mund të gjenim hapësirë ​​në buxhet për ta përdorur atë qoftë në rindërtim ose investime të tjera të planifikuara,” ka thënë Denaj për Reuters. Më pak se gjysma e obligacionit do të paguajë borxhin.

“Ne mund të ngremë tavanin (Eurobond) pak, nga 500 mln në 600 mln, ose 580 mln ose 590 mln, në varësi të nevojës në momentin që do të hyjmë në treg,” shtoi Denaj për Reuters.

Denaj ka konfirmuar për Reuters, se do të zgjidhet një këshilltar ligjor dhe menaxher i bankës drejtuese për obligacionin në ditët në vijim, duke shtuar se Standard & Poor’s vlerësoi kreditit e Shqipërisë me  një B + me një perspektivë të qëndrueshme javën e kaluar.

E.S /SCAN

Tiranë, 29 Janar (SeeNews) – Ministria e Financave e Shqipërisë u shpreh se ka për qëllim të emetojë një Eurobond  në shumën deri 600 milion euro (660.0 milion usd) me maturim nga 7 deri në 10 vjet në tregjet ndërkombëtare në fund të këtij viti.
Të ardhurat do të përdoren për të mbuluar nevojat e qeverisë për financim dhe do të menaxhojë në mënyrë proaktive detyrimet, u shpreh ministria në një deklaratë ditën e Hënë(27 janar 2020).
”Ky transaksion është në përputhje me strategjinë afat mesme të borxhit të qeverisë për të financuar si duhet borxhin me kosto sa më të ulët dhe nivel risku të moderuar” – Ministria theksoi.
Ministria gjithashtu tha se është duke ftuar ofertat për bankat e investimeve që do të drejtojnë procesin e emetimit. Afati përfundimtar për të dorëzuar propozimet është deri në 5 Shkurt.
Në 2015, Shqipëria emetoi një Eurobond shtatë vjecar me kupon 3.5% në shumën 500 milion euro, me normë më të ulet se Eurobondi pesë vjecar me kupon 5.75 % i emetuar në 2015.

SeeNews

Autoriteti i Mbikëqyrjes Financiare ka filluar një anketimin të gjerë të popullsisë në vend për njohuritë mbi tregjet financiare jobankare dhe menaxhimin e financave personale. Anketimi do të shërbejë si bazë për përditësimin e strategjisë për rritjen e besimit të konsumatorit dhe investitorit për tregjet nën mbikëqyrje dhe për përmbushjen e objektivit të AMF-së për mbrojtjen dhe edukimin financiar të publikut.

Ky anketim, i cili është ndërtuar tashmë, po zhvillohet në disa qytete të vendit duke përfshirë punonjës si të sektorit publik edhe privat, nga disa degë si në prodhim, shërbime, edukim, etj, ndërsa informacioni do të përpunohet nga grupi i studentëve të ekselencës që janë duke punuar pranë Autoritetit për të çuar më tej projektin e rritjes së edukimit financiar në vend.

Të dhënat e anketimit do ti shërbejnë AMF-së për të përditësuar Strategjinë e saj të Zhvillimit si edhe për hartimin e Strategjisë Kombëtare për Edukimin Financiar.

Për të plotësuar pyetësorin klikoni këtu

SCAN

Bursa Shqiptare e Titujve, ALSE, realizoi një volum tregtimi prej rreth 2.5 miliardë lekësh për vitin e kaluar. Autoriteti i Mbikëqyrjes Financiare ka publikuar të dhënat zyrtare të tregtimit gjatë vitit të kaluar, që dëshmuan një qëndrueshmëri të aktivitetit të Bursës, në vlera të përafërta me vitin 2018.

Në pjesën më të madhe, bëhet fjalë për veprime me obligacione të qeverisë shqiptare, që shoqëritë komisionere, anëtare të bursës, i kanë kryer për llogari të klientëve të tyre. Aktualisht, bursa ALSE ka katër anëtarë, nga të cilat tre janë banka të rëndësishme tregtare.

Bursa Shqiptare e Titujve nisi tregtimin në 22 shkurt 2018, me tregtimin e bonove dhe obligacioneve të qeverisë shqiptare. Që nga shkurti 2019, ALSE është ligjërisht e licencuar për të tregtuar edhe tituj të kompanive private. Megjithatë, për shkak të pengesave të natyrës burokratike dhe teknike, tregtimi i këtyre titujve nuk ka qenë ende i mundur.

Pritet që ALSE ta ofrojë këtë mundësi shumë shpejt gjatë vitit 2020. Tregu i titujve të kompanive private dhe sidomos i instrumenteve të borxhit paraqet potenciale në rritje gjatë viteve të fundit. Disa kompani të sektorit financiar po emetojnë rregullisht obligacione me ofertë private.

Dy prej shoqërive anëtare të Bursës, Credins Bank dhe ABi Bank, së fundmi kanë zgjeruar licencën e tyre të brokerimit, për të mundësuar edhe tregtimin e titujve të emetuar nga shoqëritë tregtare.

Ersuin Shehu/SCAN

Gjatë periudhës afatmesme 2020-2022 qeveria do të financojë 80 për qind të nevojave për borxh të ri nga tregu i brendshëm. Megjithatë, sipas Ministrisë së Financave financimi i brendshëm rezulton të jetë i kufizuar dhe rritja vjetore e tij përtej nivelit 20-25 miliard Lekë mund të ushtrojë presion rritës mbi normat e interesit.

Ministria e Financave planifikon se nëpërmjet titujve afatshkurtër kryesisht do të realizohet menaxhimi aktiv i nevojave për likuiditet dhe do të synohet përmirësimi i profilit vjetor të maturimeve. Ndërkohë, borxhi i ri, i destinuar për të mbuluar një pjesë të deficitit të përgjithshëm do të synohet të mbulohet nëpërmjet titujve afatgjatë.

Titujt afatgjatë planifikohen të emetohen me norma interesi fikse, gjithsesi duke mos përjashtuar edhe emetimin e titujve me norma interesi të ndryshueshme në periudhën afatmesme, në varësi të kushteve të tregut të brendshëm.

Në periudhën afatshkurtër (2019-2020) titujt shtetërorë planifikohen të emetohen kryesisht në monedhën vendase. Ndërkohë, në periudhën afatmesme dhe afatgjatë planifikohet të ketë emetime të titujve shtetërorë në valutë me qëllim sigurimin e valutës së nevojshme për të shërbyer detyrimet e borxhit në valutë. Madhësitë e këtyre emetimeve do të vlerësohen periudhë pas periudhe, duke konsideruar kushtet e tregut vendas në raport me tregjet e huaja dhe disponueshmërinë e financimeve të huaja nga burime shumëpalëshe dhe dypalëshe në formën e mbështetjes buxhetore.

Në periudhën afatmesme, huamarrja nëpërmjet burimeve të huaja në terma bruto do të plotësojë mesatarisht deri në 20% të nevojave të përgjithshme për hua të qeverisjes qendrore.

Planet e Ministrisë së Financave sugjerojnë se, instrumentet kryesore të huamarrjes së huaj do të jenë huatë nga kreditorët me natyrë shumëpalëshe dhe dypalëshe, të cilat do të financojnë projektet ekzistuese dhe projektet e reja zhvillimore, si edhe huatë në formën e mbështetjes buxhetore të akorduara nga institucionet financiare ndërkombëtare, të cilat do të synojnë mbështetjen e reformave të ndërmarra nga qeveria.

Gjithashtu, edhe financimi me Eurobond dhe/ose instrumente të tjera alternative nga burime private janë burime potenciale të financimit të huaj në periudhën afatmesme. Megjithatë, madhësia dhe karakteristika të tjera të këtyre instrumenteve do të përcaktohen vit pas viti në përputhje me nevojat për realizimin e objektivave.

Burimi: Revista Monitor

Normat e interesit të instrumenteve të borxhit qeveritar e nisën në rënie edhe vitin 2020. Obligacionet me maturim 10 vjeçar, u emetuan në fillim të kësaj jave me një kupon prej 5.29%, në rënie nga niveli prej 5.53% i ankandit të fundit, në tetor të vitit të kaluar. Ministria e Financave siguroi pothuajse të plotë shumën e shpallur për financim, prej 4 miliardë lekësh.

Kërkesat për të blerë obligacione në ankand arritën në pothuajse 5.7 miliardë lekë, duke konfirmuar një interes të lartë të tregut për të investuar në titujt e qeverisë. Obligacionet 10 vjeçare, për shkak të maturitetit të gjatë, ofrojnë edhe kthime më të larta në raport me instrumentet e tjera të investimit financiar në monedhën vendase. Ato ngelen një investim shumë me interes për institucionet e orientuara te investimet afatgjata, si fondet e investimit dhe sidomos ato të pensioneve.

Ankandi i parë i këtij viti konfirmon pritshmëritë për norma të ulëta interesi edhe gjatë këtij viti. Tregu financiar paraqitet likuid, ndërsa sinjalet e Bankës së Shqipërisë janë për një vazhdim të politikës monetare lehtësuese, madje pa përjashtuar ulje të mëtejshme të normës bazë të interesit. Gjatë vitit të kaluar, inflacioni pësoi një rënie përtej parashikimeve të Bankës së Shqipërisë, pranë nivelit mesatar 1.4%. Në këto kushte, rritja e normave të interesit, që mund të fillonte që nga mesi i këtij viti, pritet të jetë më e largët. Pasojat në ekonomi nga tërmeti i nëntorit mund të jenë gjithashtu faktor që do të diktojë ruajtjen e një çmimi të lirë të parasë nga Banka Qendrore.

SCAN

18 Dhjetor 2019 – Bursa e Zagrebit blen 5.3% të aksioneve të Bursës së Maqedonisë në një transaksion të raportuar nga kjo e fundit.

Kjo është blerja e dytë e aksioneve të një burse rajonale nga Bursa e Zagrebit, pas blerjes së 100% të aksioneve të Bursës së Lubljanës gjatë vitit 2015 nga Bursa e Vienës.

Bursa e Zagrebit ka bashkëpunuar për shumë vite në mënyrë të sukseshme me Bursën e Maqedonisë duke shkëmbyer njohuri (know – how), ide dhe ekspertizë që nga viti 2014, kur bursa rajonale SEE Link u themelua së bashku me Bursën e Bullgarisë. Të tre Bursat themeluese ndanin pronësi të barabartë ne SEE Link. Bashkëpunimi u intensifikua më herët këtë vit, kur Bursa e Maqedonisë nënshkroi një marrveshje ekskluzive bashkëpunimi me kompaninë Kroate, Funderbeam South East Europe (SEE), në të cilën Bursa e Zagrebit zotëron 20% të pronësisë, dhe është pjesë e Estonia Funderbeam Group, të cilët operojnë si një platformë financimi start – up pë ndërmarrjet e vogla dhe të mesme (SMEs). Partneriteti me Bursën e Maqedonisë është bërë kryesisht për qëllime edukative dhe për të promovuar kompanitë vendase me mundësinë për të rritur kapital nëpërmjet një platforme inovative me qëllimin e zhvillimit të mëtejshëm të biznesit deri në maturimin e tyre në mënyrë që të arrijnë fazën për të qënë potencial për t’u listuar në Bursën e Maqedonisë.

“Ndërlidhja e tregjeve të kapitalit është një rrugë logjike jo vetëm në rang rajonal por edhe global ndërsa tregjet – veçanërisht të voglat – kanë nevojë për transparencë më të madhe dhe invesitorët janë në kërkim të shërbimeve më ekonomike dhe eficiente. Eksperienca që ne morëm nga blerja e Bursës së Ljubljanës ishtë mjaft pozitive, dhe besojmë se një pjesë e saj do të implementohet në mënyrë të suksesshme në rolin tonë si aksioner në minorancë në Bursën e Maqedonisë. Nëpërmjet eksperiencës sonë në Kroaci dhe Slloveni ne jemi të vetëdijshëm që secila nga ekonomitë rajonale ka nevojë për një treg vendas kapitali më të fortë dhe në këtë drejtim ne do të ndihmojmë në rritjen e rolit të Bursës së Maqedonisë në ekonominë vendase. Ne besojmë se Bursa e Maqedonisë ka dukshëm mundësi për rritjen dhe zgjerimin e gamës së produkteve që ofron dhe synojmë të jemi pjesë aktive në këtë zhvillim, veçanërisht përsa i përket përputhshmërisë së legjislacionit Maqedonas me atë Europian, në të cilën ne kemi mjaftueshëm eksperiencë” – u shpreh Ivana Gazic, Presidente e Bordit Drejtues të Bursës së Zagrebit.

 

Kompania ALREG është licencuar nga Banka e Shqipërisë si operator i sistemit për shlyerjen e titujve. Ky licencim i hap përfundimisht rrugën listimit të kompanive private në Bursën Shqiptare të Titujve, ALSE. Regjistri është një hallkë e domosodshme për funksionimin e tregut të titujve, sepse aty administrohen të dhënat dhe të drejtat e pronësisë mbi to.

ALREG ishte licencuar si regjistër titujsh nga Autoriteti i Mbikëqyrjes Financiare në muajin janar të këtij vitit. Por, për të kryer plotësisht funksionin e vet në shërbim të tregtimit të titujve, nevojitej edhe një licencë nga banka qendrore për të vepruar si operator pagesash. Përmes këtij funksioni, ALREG do të kryejë në mënyrë të njëkohshme transferimin e të drejtës së pronësisë mbi titujt e tregtuar dhe kryerjen e pagesës nga blerësi për te shitësi.

Bursa Shqiptare e Titujve ALSE, nisi aktivitetin në shkurt të vitit të kaluar, me tregtimin e bonove dhe obligacioneve të qeverisë shqiptare. Që nga shkurti i këtij viti, ajo është ligjërisht e licencuar edhe për të tregtuar titujt e kompanive private.

Licencimi i plotë i ALREG mundëson tashmë që Bursa të mund të kryejë edhe në praktikë një tregtim të tillë.

Vitet e fundit, potencialet për zhvillimin e bursës në Shqipëri janë në rritje. Disa kompani, kryesisht brenda sektorit financiar, kanë aplikuar me sukses emetimin e obligacioneve me ofertë private. Hapja e Bursës do të mundësojë që obligacionet, por eventualisht edhe aksionet e reja të shoqërive tregtare, të emetohen edhe me ofertë publike. Oferta publike do të mundësojë kuotimin e një çmimi më të drejtë emetimi dhe tregtimin e vazhdueshëm dytësor të këtyre titujve.

Bursa do t’iu mundësojë gjithashtu bizneseve rritjen e kapitalit përmes emetimit të aksioneve të reja. Për publikun e gjerë, titujt e kompanive private krijojnë alternativa të reja dhe kthime më të larta nga investimi.

Burimi: Portali PARAJA.NET