Category: Lajme nga Tregu

Kuvendi ka shtyrë për në vjeshtë votimin e kryetarit të Bordit të Autoritetit të Mbikëqyrjes Financiare (AMF). Në momentin kur kryetari Kuvendit ftoi për votim, ndërhyri deputeti demokrat Valter Haliti i cili u shpreh se ka kandidatë në konflikt interesi dhe se grupi demokrat kërkon mirëkuptimin e grupit parlamentar të PS për më shumë kohë për të vendosur. Kreu grupit socialist Taulant Balla u shpreh dakort me propozimin e demokratëve për ta shtyrë për në shtator procedurën e votimit të kryetarit të Bordit të AMF.

Komisioni Ekonomisë ka zhvilluar dy procedura për përzgjedhjen e kryetarit të AMF për shkak se disa nga kandidatët kanë patur probleme me konfliktet e interest ose angazhimet politike duke shtuar dyshimet te partnerët ndërkombëtarë për cënimin e pavarësisë së institucioneve mbikëqyrëse financiare. Sipas ligjit “Per Autoritetin e Mbikqyrjes Financiare”, antarët/kryetari Bordit duhet të jenë të paangazhuar ne funksione drejtuese partiake. Në përmbushje të kërkesave dhe dispozitave ligjore për konfliktin e interesave, nuk mund te jenë anetarë të Bordit të Autoritetit persona, të cilët: (a) në tre vitet e fundit kanë qenë ortakë, aksionarë, apo anëtarë të organeve drejtuese të subjekteve të mbikëqyrura; (b) kanë lidhje familjare me personat e parashikuar në shkronjen “a”; (c) në tre vitet e fundit kanë qenë punonjës me kohë të pjesshme apo të plotë në subjektet e mbikëqyrura.

Sipas një njoftimi të fundit të AMF , Fondi Monetar Ndërkombëtar në përmbyllje të misionit të dytë të monitorimit, theksoi rëndësinë e sigurimit të mbikëqyrjes së fortë dhe të pavarur të sistemi financiar jobankar nga Autoriteti i Mbikëqyrjes Financiare (AMF), i cili është duke përgatitur në mënyrë progresive kuadrin rregullator të nevojshëm.”.

Komisioni Evropian në raportin e fundit për Shqipërinë, në Kapitullin 9 “Shërbimet Financiare” vlerëson ecurinë e vendit në shërbimet financiare. Raporti vlerëson pozitivisht zhvillimet në infrastrukturën e tregjeve financiare me licensimin e bursës private ALSE, miratimin nga Autoriteti i Mbikëqyrjes Financiare të Strategjisë 2018-2022 për zhvillimin e AMF-së dhe tregjeve nën mbikëqyrjen e saj, si edhe zbatimin e Strategjisë për rritjen e besimit të konsumatorit dhe investitorit për tregjet nën mbikëqyrje.

Sipas relacionit të shoqërues të projektvendimit në datën 5 shkurt 2019, Komisioni Ekonomisë organizoi seancen degjimore dhe seancen per shqyrtimin e kandidaturave dhe votimin e kandidaturave per Kryetar te Bordit te Autoritetit te Mbikqyrjes Financiare, Bilal Kola, Pajtim Melani, Olsi Çoku dhe Ardit Çollaku. Faza e dytë u zhvillua ne date 12 Prill brenda te cilit depozituan dokumentacionin:Pajtim MELANI; Ervin METE dhe Olsi ÇOKU.

Gjate seancës dëgjimore të datës 17 prill 2019, kandidaturat u prezantuan dhe ju përgjigjen pyetjeve të Deputetëve. Deputetët vlerësuan maksimalisht të gjitha kandidaturat. Kryetari i Komisionit të Ekonomisë dhe Financave vlerësoi që në Kuvend po prezantohen kandidatura cilesore dhe me integritet profesional. Në përfundim të votimit dhe vlerësimit për të gjithë kandidatët, me voten pro të deputetëve të maxhorancës dhe abstenimin e deputetit të opozites, u vendos që të tre kandidaturat t’i përcillen për votim dhe vendimmarrje përfundimtare seancës plenare.

REVISTA MONITOR

Komisioni i Letrave me Vlere të Qipros (CySEC) ka paralajmëruar disa herë publikun se persona të pa autorizuar prezantohen si zyrtarë të Komisionit të Letrave me Vlerë të Qipros (CySEC) ose si përfaqësues të emëruar nga ky Autoritet, duke u kërkuar investitorëve para në këmbim të zgjidhjes fiktive të kërkesave për kompensimin e humbjeve që mund të pësojnë investitorët nga investimi tek një numër shoqërish brokerimi të licencuara dhe mbikëqyrura nga Autoriteti i Qipros.
Me qëllim mbrojtjen e investitorëve në nivel ndërkombëtar, CySEC ka kërkuar nga të gjithë anëtarët e Organizatës Ndërkombëtare të Komisioneve të Letrave me vlerë të asistojnë në publikimin e këtij njoftimi.

Autoriteti i Mbikëqyrjes Financiare, si nënshkrues i Marrëveshjes Shumëpalëshe mes anëtarëve të IOSCO-s dhe si anëtar me të drejta të plota i kësaj organizate vlerësoi nevojën e publikimit të këtij njoftimi.

Fushata online mjaft e sofistikuar nga personat e paautorizuar po shndërrohet në një skemë mashtrimi, ku:

• Individë të cilët pretendojnë të jenë punonjës të Komisionit të Letrave me Vlerë të Qipros, apo konsulentë ligjorë të tij, apo punonjës të autoriteteve të tjera financiare Qipriote (Bankës Qendrore e Qipros) kontaktojnë investitorë të ndryshëm nëpërmjet e-maileve të cilët përmbajnë emrin, adresën, vulën dhe logon zyrtare të CySEC dhe gjithashtu edhe firmën e punonjësve të autoritetit;
• Premtojnë për kompensime mbi probleme të mundshme që investitorët kanë hasur me disa kompani (platforma tregtimi të letrave me vlerë të cilat ofrojnë produkte spekulative investimi).

AMF, duke u mbështetur në paralajmërimet e CySEC sqaron se Komisioni i Letrave me Vlerë të Qipros nuk dërgon kurrë këto lloj kërkesash tek investitorët apo tek publiku i gjerë, si dhe gjithashtu:

• Nuk kërkon asnjë të dhënë personale, apo financiare;
• Nuk ka të drejtë të mbledhë tarifa nga investitorë individualë, si dhe nuk ka të drejtë për të caktuar persona të tretë të veprojnë në këtë mënyrë në emër të tij;
• Nuk është i përfshirë, dhe nuk ka kompetenca të kërkojë kompensime në grup, në emër të të tretëve.

Shembull i një skeme të tillë paraqitet më poshtë:
Rasti më i fundit i një skeme të ngjashme përfshinte një individ i cili hiqej si “Christos Sofroniou”, dhe kishte për qëllim të kontaktonte investitorë në vende të ndryshme (përfshirë edhe vendet e BE-së) dhe t’u mbushte mendjen atyre të paguanin tarifa ligjore për të marrë pjesë në programe të rreme për të rikuperuar humbjet nga platformat e investimit. Në këtë komunikim, logoja e CySEC përdorej në mënyrë të pa autorizuar. Ky individ përdorte adresën elektronike contact@sofroniou-legal.org si dhe numrat e telefonit +35725654263; +35799711917.

AMF paralajmëron publikun të qëndrojë vigjilent në lidhje me komunikime të ngjashme nga çdokush i cili hiqet si përfaqësues i CySEC apo autoriteteve të ngjashme, dhe në asnjë mënyrë nuk duhet të transferojë para për llogari të tyre.

Investitorët janë të lutur të kontaktojnë CySEC apo çdo autoritet tjetër nga i cili kontaktohen për të verifikuar autencitetin e komunikimit.

Tregohuni të kujdesshëm që të mos bini pre e mashtrimeve.

Burimi: Autoriteti Mbikqyrjes Financiare

Interesat e bonove të thesarit në tregun primar po rriten edhe gjatë muajit qershor. Në ankandin e të martës, bonot me maturim 12 mujor regjistruan një interes mesatar të ponderuar prej 1.68%, nga 1.46% që kishte qenë në ankandin e mëparshëm.

Pas disa muajsh me radhë të rënies së interesave deri në vlera minimale historike, muaji maj shënoi një pikë kthese. Rregullimi në rritje i interesave ishte i pritshëm, duke pasur parasysh se rënia kishte arritur nivele shumë të ulëta dhe ndoshta të paparashikuara. Sidomos pas emetimit të eurobondit, në tetor të vitit të kaluar, tregu i brendshëm financiar u gjend edhe më likuid se zakonisht. Kjo rriti konkurrencën mes investitorëve për të blerë bono dhe obligacione, në mungesë të alternativave të tjera të investimit financiar në monedhën vendase.

Interesat e letrave të borxhit qeveritar zbritën në vlera të paregjistruara më parë, por kjo rënie natyrshëm arriti një pikë fundore dhe interesat po nisin të lëvizin drejt niveleve më të arsyeshme. Nga ana tjetër, edhe kërkesa e tregut financiar për të blerë bono është reduktuar disi në ankandet e fundit. Në ankandin e djeshëm, vlera e kërkesave ishte vetëm lehtësisht më e lartë se shuma e bonove të shpallura për shitje nga Ministria e Financave.

Kjo tregon se tregu i titujve qeveritarë mund ta ketë përthithur pjesërisht likuiditetin e tepërt të krijuar. Pavarësisht se interesat janë në një cikël axhustimi në rritje, ekspertët nuk presin që kjo rritje të ketë përmasa të mëdha.

Ersuin Shehu/SCAN

Sipas të dhënave zyrtare të Ministrisë së Financave, interesi fiks i obligacionit dyvjeçar arriti më 6 qershor 1,99%, niveli më i lartë i shënuar këtë vit për këtë afat maturimi.

Në raport me ankandin e mëparshëm, interesi shënoi rritje me 0.35 pikë përqindje. Pak a shumë ecuri të ngjashme kanë pasur edhe emetimet e maturimeve të tjera, teksa shihet se qeveria ka shtuar emetimin e bonove të thesarit 12 mujore.

Interesi në këtë maturim shënoi 1.61% në ankandin e datës 3 qershor, me një rritje 0.16 pikë përqindje  në raport me ankandin e mëparshëm.

Oferta për blerjen e borxhit ka qenë më e lartë se kërkesa e qeverisë por diferenca ka ardhur duke e ngushtuar, për shkak se qeveria ka rritur kërkesën për borxh sqarojnë burimet nga tregu.

Në tremujorin e parë të vitit, interesat e instrumenteve te borxhit të qeverisë pothuajse u përgjysmuan në raport me të njëjtën periudhë të një viti më parë.

Ulja e interesave po ndikohet nga emetimi i Eurobondit vitin e kaluar, me vlerë 500 milionë euro. Nga kjo shumë, 350 milionë euro shkuan për rifinancimin e Eurobondit aktual, ndërsa pjesa tjetër prej 150 milionë eurosh po përdoret për financimin e deficitit buxhetor.

Për rrjedhojë, qeveria pati pak hapësirë se vitin e kaluar për financim nga tregu i brendshëm, teksa oferta e bankave mbeti e njëjtë. Ky fenomen ka sjellë rënien e interesave për të gjitha maturimet.

Drejtimet kryesore ku bankat shqiptare i investojnë kursimet e qytetarëve janë huaja për ekonominë dhe blerja e borxhit të qeverisë. Për shkak të nivelit të lartë të kredive me probleme dhe kërkesës së vakët të ekonomisë për kredi, bankat kanë limituar huanë, teksa kanë rritur interesin për të blerë borxhin e qeverisë.

Sipas një analize të Ministrisë së Financave, në tregun primar të titujve shtetërorë, normat e interesit për pothuajse të gjithë titujt shtetërorë kanë ndjekur një trajektore rënëse gjatë vitit 2018. Në periudhën afatmesme parashikimet e normave të interesit flasin për një rritje graduale duke filluar nga gjysma e dytë e vitit 2019.

Revista Monitor

Tregu i kapitalit në vend po fiton gjithnjë më shumë gjallëri. Në dy mbledhjet e fundit, Bordi Drejtues i Autoritetit të Mbikëqyrjes Financiare ka miratuar disa vendime që lidhen me zhvillime në këtë treg. Në tregun e obligacioneve të shoqërive private, është miratuar prospekti i emetimit të radhës nga fondi Besa.

Ky institucion do të emetojë sërish obligacione me ofertë private, për një vlerë prej 100 milionë lekësh. Fondi Besa është bërë një nga kompanitë që tashmë po emeton në mënyrë periodike obligacione, së bashku me Credins Bank, Fibank dhe institucionin tjetër financiar NOA.

Hapja e bursës ALSE për tregtimin e titujve të kompanive private pritet të zgjerojë potencialet e tregut e obligacioneve në vend. Bordi i AMF-së ka miratuar projektstatutin e shoqërisë International Trade Securities.

Kompania në fjalë është një firmë e re brokerimi, që do të veprojë në tregun e titujve.Gjithashtu, AMF ka miratuar edhe ndryshime në prospektin e tre fondeve të pensioneve vullnetare të licencuar në Shqipëri, Credins Pension, Raiffeisen Pension dhe Sigal Pension.

Megjithëse ende në përmasa të vogla, tregu i pensioneve private po shfaq një ecuri mjaft inkurajuese në vitet e fundit. Në fund të marsit të këtij viti, numri i kontribuesve në fondet private të pensioneve arriti në mbi 26 mijë. Që nga viti 2015, ky numër është rritur me 107%. Ndërsa vlera e aktiveve neto të fondeve të pensioneve ka arritur në rreth 2.4 miliardë lekë, në rritje me 167% në harkun e katër viteve të fundit.

Ersuin Shehu /SCAN

Për të lexuar Raportin Vjetor 2018 të AMF klikoni këtu

Drejtori i Përgjithshëm Ekzekutiv i Autoritetit të Mbikëqyrjes Financiare, Z. Ervin Koçi prezantoi sot, më 30.05.2019, në seancë plenare në Kuvendin e Shqipërisë, Raportin mbi aktivitetin e Autoritetit gjatë vitit 2018. Z. Koçi u ndal në zhvillimet dhe arritjet kryesore të vitit të kaluar, ndërsa përmendi disa nga sfidat me të cilat përballet Autoriteti dhe tregjet nën mbikëqyrje.

Në fjalën e tij, Drejtori i Përgjithshëm Ekzekutiv theksoi se Autoriteti ka plotësuar rekomandimet e lëna nga Kuvendi përmes rezolutës “Për veprimtarinë e Autoritetit të Mbikëqyrjes Financiare për vitin 2017”. Z. Koçi u ndal te masat e marra nga Autoriteti për mbrojtjen e konsumatorit dhe investitorit, forcimin e rolit mbikëqyrës, rritjen e edukimit financiar, etj. Ai iu referua vlerësimeve të bëra për punën e Autoritetit në raportin e fundit të Komisionit Europian për Shqipërinë, si edhe rekomandimeve të institucioneve më të rëndësishme financiare ndërkombëtare.

Drejtori i Përgjithshëm Ekzekutiv, duke iu referuar strategjisë së miratuar vitin e kaluar për zhvillimin e AMF-së dhe tregjeve nën mbikëqyrje 2018-2022, theksoi se sfida kryesore e Autoritetit do të jetë transformimi i tregjeve financiare jobankare nga tregjet më të brishta në rajon në një nga tregjet financiare më të konsoliduara në Ballkanin Perëndimor.

Për të lexuar të plotë fjalën në Kuvendin e Shqipërisë, kliko këtu

Burimi : AMF

Gjysma e parave të shqiptarëve janë të ngujuara dhe nuk investohen në ekonomi. Sipas drejtorit ekzekutiv të Autoritet të Mbikëqyrjes Financiare, Ervin Koçi, raporti midis kredive dhe depozitave është shqetësues, ndërsa nivelit e investimeve përmes bursës dhe fondeve të investimit janë shumë të ulëta.

Nëse fondet do të kanalizoheshin në këto instrumente, ato do të rrisnin performancën ekonomike të vendit.

50% e parave shqiptare sot flenë gjumë. Nuk injektohen në ekonomi. Në rast se ne do ta ndjekim me kujdes, duke bashkëpunuar me të gjithë faktorët. Jam i sigurt që nëse arrijmë të kanalizojmë në bursë qoftë edhe 10% të këtyre parave, atëherë do të mund të ndikojnë në rritjen ekonomike minimalisht 1%”, tha Koçi.

Tregu i fondeve të investimeve rezultoi në rënie gjatë vitit 2018, ndërsa aktiviteti i bursës është ende shumë i dobët. Por edhe këto instrumente investimi shkojnë kryesisht për bono dhe obligacione shtetërore, thënë ndryshe për të financuar borxhin e qeverisë.

Burimi : a2news

Autoriteti i Mbikëqyrjes Financiare prezantoi të hënën para Komisionit Kuvendor për Ekonominë dhe Financat raportin vjetor të aktivitetit për vitin 2018.

Drejtori i përgjithshëm ekzekutiv, Ervin Koçi, nënvizoi zhvillimet pozitive në tregjet financiare, një ndër të cilat ishte edhe nisja e operacioneve të Bursës Shqiptare të Titujve, ALSE, e para bursë funksionale në historinë e vendit. Që nga shkurti i vitit të kaluar, ALSE mundëson tregtimin e bonove dhe obligacioneve të qeverisë shqiptare, ndërsa këtë vit pritet të nisë edhe tregtimit i titujve të kompanive private.

Vitin e kaluar, AMF prezantoi strategjinë 5-vjeçare të zhvillimit të tregjeve, ku një objektiv i rëndësishëm është edhe zgjerimi i tregut financiar. Sipas AMF-së, strategjia synon të nxisë zhvillimin e një tregu konkurrent dhe eficient, duke i dhënë mundësi krijimit të produkteve inovative dhe duke rritur besimin e publikut.

Ersuin Shehu/SCAN

Autoriteti i Mbikëqyrjes Financiare, përfundoi zbatimin e projektit “Huaja për Politikat e Zhvillimit të Sektorit Financiar” të mbështetur nga Banka Botërore. AMF ishte përfituese në kolonën e tretë të këtij projekti “Forcimi i rregullimit dhe mbikëqyrjes së fondeve të investimeve”. Raporti i ekipit të Bankës Botërore vlerëson se AMF i ka realizuar gjithë treguesit e performancës së projektit dhe i vlerëson ato në mënyrë të kënaqshme.

Përfshirja e AMF-së në këtë projekt solli, si përmirësime të kuadrit ligjor rregullues, për t’ju përshtatur zhvillimeve të vrullshme në tregun e kapitalit në vend, ashtu edhe forcimin e rolit mbikëqyrës të Autoritetit. Në kuadër të projektit, u miratua në Kuvendin e Shqipërisë ndryshimi i legjislacionin përkatës. Bordi i AMF-së miratoi rregulloren “Për administrimin e riskut të shoqërisë administruese të sipërmarrjeve të investimeve kolektive” si edhe rregulloren “Për administrimin e likuiditetit për fondin e investimit”. Në shkurt 2018 rregullorja e likuiditetit, e miratuar më herët, u plotësua me të tjera kritere duke rritur limitin e aseteve likuide që duhet të mbajnë fondet e investimeve për t’ju përgjigjur kërkesave të mundshme të investitorëve.

Eksperienca e fituar në zbatimin e projektit dhe masat e ndërmarra për minimumin e likuiditetit të kërkuar nga fondet e investimeve, rritën më shumë mbrojtjen e investitorëve, duke fuqizuar rolin mbikëqyrës të Autoritetit. Mbrojtja e konsumatorit dhe investitorit në sektorin financiar jobankar, është vendosur nga AMF, si një ndër prioritetet dhe objektivat e rëndësishme të punës në vazhdimësi.

Raporti i ekipit të Bankës Botërore, për kolonën e tretë ku përfshihej AMF, nënvizon se të gjithë indikatorët kryesorë të performacës u arritën. Ai i vlerëson të kënaqshme rezultatet e arritura në këtë projekt, duke theksuar edhe përkushtimin e lartë për të arritur përmirësime të qëndrueshme në stabilitetin financiar.

Revista Monitor